«Алтын ҡуллы Сибай һылыуҡайы»

Сибай ҡалаһында күптән инде матур йолаға әүерелгән “Алтын ҡуллы Сибай һылыуҡайы” гүзәллек бәйгеһе үтте. Был сара ысын мәғәнәһендә рухлы, сая, дәртле һәм һәләтле башҡорт ҡыҙҙары бәйгеһе булды. Конкурста йәмғеһе 14 ҡыҙ ҡатнашырға теләк белдерҙе. Һайлап алыу турынан финалға иң һылыу, иң оҫта, иң һәләтле 7 ҡыҙ үтте. Конкурсанттар бер ай дауамында Халыҡ мәҙәниәте һәм ял үҙәгендә Башҡортостандың атҡаҙанған мәҙәниәт хеҙмәткәре Мәмдүҙә Илбаҡова етәкселегендә вокал менән шөғөлләнде, Башҡортостандың атҡаҙанған мәҙәниәт хеҙмәткәре Дилара Рафиҡованан ҡумыҙ сиртеү серҙәренә төшөндө, Минзилә Ғәйнуллинанан ҡул эшен үҙләштерҙе, Инна Пивоварова һәм Екатерина Решетникованан заманса бейеү һәм Башҡортостандың атҡаҙанған артисткаһы Лариса Хатмуллинанан халыҡ бейеүен өйрәнде. Шулай итеп етди әҙерлек үткәс 4 апрель көнө һылыуҡайҙар Сибай концерт-театр берекмәһе сәхнәһендә баһалама ағзаларына үҙҙәренең һәләттәрен күрһәтте. Конкурс шарттары буйынса ҡыҙҙар ҡул эштәре, аш-һыуға оҫталығын, сәхнәлә мосолман, киске күлдәктә, милли кейемдә дефиле, ҡумыҙҙа сиртеү оҫталығын, заманса һәм халыҡ бейеүҙәрен оҫта башҡара белеүен һәм жюриларҙың яуаптарына тапҡыр яуап бирә алыу һәләтен күрһәтергә тейеш ине. Ҡыҙҙар бөтә һынауҙарҙы ла яҡшы үтәп үҙҙәрен бар яҡтан күрһәтә алды. Шулай итеп жюри ҡарары менән еңеүселәр билдәләнде.
Гран-при-Азалия Байғабулова
1 урын- Айһылыу Хәйруллина
2 урын-Нәргизә Вәлиева
3 урын-Айзилә Солтанова
“Иң нәзәкәтле һылыуҡай”- Әлиә Өмөтҡужина
“Иң наҙлы һылыуҡай” – Наҙгөл Ишмөхәмәтова
“Иң һөйкөмлө һылыуҡай” – Филүзә Бүләкова
Ҡыҙҙарға артабан тағы ла юғарыраҡ үрҙәр, уңыштар һәм ижади ҡомар теләйбеҙ. Конкурсты ойоштороуҙа һәм үткәреүҙә ярҙам итеүсе барлыҡ бағымсыларға ихлас рәхмәт еткерәбеҙ.Уларға эштәрендә уңыштар, ғаилә бәхете, һаулыҡ һәм бәрәкәт теләйбеҙ.
#Сибайкультура
#Халыҡмәҙәниәтеһәмялүҙәге